RRETH NESH
Gjimnazi “Perikli Ikonomi” hapi dyert për herë të parë në fillim të vitit shkollor 1984-1985 duke përfshirë fillimisht nxënës të viteve të dyta të gjimnazit të vjetër, nxënës të shkollës së mesme të ndërtimit dhe të shkollës së muzikës. Një vit më vonë u kthye tërësisht në shkollë të mesme të përgjithshme duke u njohur si gjimnazi i ri. Mori emrin e njërit prej figurave të njohura të arsimit tonë kombëtar, mësuesit Perikli Ikonomi. Për mbi një dekadë ky gjimnaz numëronte deri në 1200 nxënës në vit, ndërsa aktualisht në të mësojnë rreth 500 nxënës dhe japin mësim mbi 30 mësues.
Që në fillimet e veta u profilizua si qendër e aktiviteteve sportive, duke pasur edhe mjediset më të përshtatshme në qytetin e Fierit. Nxënësit e gjimnazit të ri vazhdimisht shquhen në konkurset, kampionatet dhe olimpiadat lokale duke i dhuruar shkollës një seri medaljesh dhe titujsh fitoreje në të gjitha fushat e jetës kulturore e artistike të institucioneve arsimore në Fier.
Shkolla është rikonstruktuar së fundmi në vitin 2017 dhe ka veç laboratorëve të tjerë, edhe dy kabinete të mësimdhënies digjitale, palestër, si edhe terrenin sportiv më të madh ndër shkollat e qytetit të Fierit.
Gjimnazi “Perikli Ikonomi” e lidh emrin e vet me shumë njerëz të suksesshëm të qytetit që studiuan në këtë shkollë dhe mësues të vlerësuar në qytet, të cilët dhanë kontributin e tyre këtu për vite me radhë.
